Þorsteinn Ragnarsson

Hrikalegt var að fylgjast með því í beinni útsendingu hvernig lögreglan í Reykjavík drullaði gjörsamlega upp á bak í framhaldi af aðgerðum vörubílstjóra. Það var nöturlegt að sjá menn í lögreglubúningum missa svona algerlega stjórn á sér, sprautandi piparúða framan í vegfarendur. Að sjá þessa menn öskrandi eins og brjálæðinga og sprautandi þessum úða á vegfarendur og reyna að hitta fólk á 10 metra færi. Þetta var algerlega út úr korti. Ég er á því að þarna hafi lögreglan átt alerlega sök á því ástandi sem varð. Það hefur komið fram að bílstjórarnir vildu fara með bílana í burtu, en lögreglan ekki tekið það í mál, þar sem komið var fram yfir einhver tímamörk sem lögreglan setti. Það má vera ljóst af því sem bæði lögreglan og bílstjórar hafa sagt um atburðarásina að lögreglan var að kalla eftir svona fjöri. Þeir gátu leyst málið án átaka, en vildu frekar hasar. Það fór um mann hálfgerður kjánahrollur að sjá þessar aðfarir. Íslenska óeirðalöggan í aðgerðum. Flokkur manna standandi bak við plasthlífar og verja sig fyrir eggjakasti. Á meðan aðrir gengu um algerlega vitstola og sprautuðu þessum úða framan í hvern sem var, bara hvern sem kom í færi við bununa úr brúsunum. Það var ekki eins og þessir menn væru að verjast árás. Þeir voru sjálfir árásaraðilinn. Löggan kallar þennan úða varnarúða, en í þessu tilfelli var hann árásartæki. Menn geta svo haft skoðun á þessum aðgerðum bílstjóranna. Það hlýtur að vera pirrandi að sitja fastur í umferðinni alveg óundirbúið tímunum saman bara af því að einhverjur trukkakallar loka veginum fyrir manni. En það er bara allt annað mál.